Putin Trampga sovg‘a qilgan futbol to‘pi xavfsizlik tekshiruvidan o‘tkazildi

Helsinki sammitida Rossiya prezidenti Vladimir Putin hamkasbi Donald Trampga futbol to‘pini taqdim etgandi. AQSh maxfiy xizmati aynan shu sovg‘ani jiddiy tekshiruvdan o‘tkazishga qaror qilgan. Bu haqda Associated Press xabar qiladi.

Ma'lum qilinishicha, maxfiy xizmatdagilar o‘tkazilgan tekshiruvni xavfsizlik nuqtayi nazaridan o‘tkazilgan oddiy holat, deb aytdi. 

16 iyulda to‘pni berayotgan Putin quyidagi so‘zlarni aytgandi: 

“Suriya masalasida ustunlik biz tomonda. Prezident janoblari futbol bo‘yicha jahon chempionatini muvaffaqiyatli o‘tkazganligimizni alohida ta'kidlab o‘tdilar. Endi to‘pni janobga bermoqchiman va endi u Amerika tomonga o‘tdi”. 

AQSh rahbari ham bunga javoban Putinga Washington Capital xokkey klubida faoliyat yurituvchi rossiyalik xokkeychi Aleksandr Ovechkinning formasini taqdim etgan.