AQShning xalqaro diniy erkinlik sohasidagi maxsus topshiriqlar bo‘yicha elchisi O‘zbekistonga tashrif buyuradi

Vashington shahrida bo‘lib o‘tgan diniy erkinliklarni ilgari surish bo‘yicha vazirlar konferensiyasiga taklif etilgan O‘zbekiston Respublikasi Tashqi ishlar vaziri Abdulaziz Komilov boshchiligidagi delegatsiya 2018 yilning 27 iyul kuni AQShning xalqaro diniy erkinlik sohasidagi maxsus topshiriqlar bo‘yicha Elchisi Samuel Deyl Braunbek bilan ham uchrashdi. Bu haqda TIV Matbuot xizmati xabar bermoqda.

Suhbat chog‘ida 26-iyul kuni yakuniga yetgan Vazirlar konferensiyasi yakunlari borasida tomonlar fikr almashishdi, mazkur sohadagi O‘zbekiston – AQSh hamkorligining asosiy masalalarini muhokama qilishdi.

Uchrashuvda Samuel Deyl Braunbekning sentabr oyida O‘zbekistonga tashrifining amaliy jihatlari hamda O‘zbekiston va AQSh o‘rtasidagi hamkorlikning yaqin istiqbolda rivojlantirishga doir boshqa masalalar ko‘rib chiqildi.