​Toshkent haqida ma'lumotlar beruvchi yangi sayt ishga tushdi 

Toshkent shahar hokimligi Matbuot xizmati yangi tashkentnews.uz saytini ishga tushirmoqda. 

Hokimlik Matbuot xizmatiga tarqatgan xabarga ko‘ra, sayt foydalanuvchilari poytaxt, uning ijtimoiy-iqtisodiy hayotidagi so‘nggi yangiliklar haqida 9ta bo‘lim orqali ma'lumotga ega bo‘lishi mumkin.

Birinchi bo‘lim - «Toshkent». Bu yerda siz poytaxtda bo‘layotgan so‘nggi o‘zgarishlar, uning me'moriy ansambli, bo‘lib o‘tayotgan qiziqarli voqealar, aksiya va kutilayotgan tadbirlar haqida to‘liq ma'lumotga ega bo‘lasiz.

Shuningdek bu haqda «O‘zbekiston» bo‘limi orqali ham tanishasiz.

«Obod mahalla»- saytning maxsus bo‘limi. Ushbu bo‘limda Toshkent shahridagi obodonlashtirish va ko‘kalamzorlashtirish haqida so‘nggi yangiliklar, davlat dasturi doirasida amalga oshirilayotgan ishlar, qaysi mahallalar yangi qiyofaga kirganligi va qaysilari navbatda turganligi to‘g‘risida ma'lumotlar joylashtirilib boriladi.

«Iqtisodiyot» - mazkur bo‘lim Toshkent shahrida yaqin kelajakda joriy etiladigan yangi investitsion loyihalar haqida ma'lumotlar beradi.

«Jamiyat» - bu bo‘lim barcha uchun. Toshkentda sodir bo‘layotgan so‘nggi voqeliklar, dam olish kunlarida qayerlarga borish mumkinligi, poytaxtda o‘tkazilishi kutilayotgan aksiyalar haqidagi ma'lumotni aynan ushbu bo‘limdan oling.

«Siyosat» - bu bo‘limda O‘zbekistonning ichki va tashqi siyosatida ro‘y berayotgan siyosiy jarayonlar aks etadi.

«Texnologiya» - mazkur bo‘lim sizni yuqori texnologiyalar va IT sohasidagi yangi ishlanma va g‘oyalarning qachon va qanday amaliyotga joriy etilishi bilan tanishtirib boradi.

Toshkentga kelgan mehmon borishi lozim bo‘lgan maskanlar haqida esa «Turizm» bo‘limida ma'lum qilib boriladi. Ushbu bo‘limda poytaxtning diqqatga sazovor joylari, dam olish va ko‘ngilochar maskanlari haqida to‘liq ma'lumot berib boriladi.

Sport bilan shug‘ullanuvchi yurtdoshlarimizning yangi g‘alabalari haqida «Sport» bo‘limidan ma'lumot oling.

«Ular Toshkentda yashaydi» - rejalashtirilayotgan bo‘lim bo‘lib, u orqali poytaxtda istiqomat qilayotgan oddiy insonlar, ularning mehnati va faoliyati sabab, yurtimiz va shahrimizning rivojlanishi uchun xizmat qilayotgan yangiliklar haqida ma'lumot olasiz. Bir so‘z bilan aytganda bu bo‘lim Toshkentda yashayotgan yurtdoshlarimiz haqida ocherk.

Ma'lum qilinishicha, yangi sayt hozirda sinov rejimida ish olib bormoqda.