O‘z turmush o‘rtog‘ining qotiliga aylangan shaxsga hukm o‘qildi

2018 yilning avgust oyida jinoyat ishlari bo‘yicha Toshkent shahar sudida ochiq sud majlisi o‘tkazildi. Toshkent shahar sudi raisi B.Islamov raisligida olib borilgan sud majlisida sudlanuvchi Azizov Dostonbek Sadriddin o‘g‘liga nisbatan jinoyat ishi ko‘rib chiqildi.

Ma'lum bo‘lishicha, sudlanuvchi Dostonbek Azizov 2017 yilning 7 oktabr kuni O.A. bilan qonuniy nikohdan o‘tgan. Birgalikdagi turmushlari davomida Azizov ayolini unga nisbatan xiyonat qilganlikda asossiz ayblab, muntazam ravishda o‘zaro janjallashgani hamda kaltaklagani uchun bir necha marta ma'muriy jazoga tortilgan bo‘lishiga qaramay, bundan o‘ziga tegishli xulosa chiqarmagan.

2018 yilning 18 aprel kuni soat 12⁰⁰atrofida Dostonbek rashk tufayli turmush o‘rtog‘i O.A.ni qasddan o‘ldirish maqsadida pichoq bilan qurollangan va qonuniy nikohini bekor qilish uchun ayoli bilan janjallashgan, tanasining turli sohalariga pichoq bilan bir necha jarohat yetkazgan va voqea joyidan yashiringan. O.A. olgan tan jarohatlari natijasida vafot etgan.

Sud hukmiga ko‘ra, D.Azizov O‘zbekiston Respublikasining Jinoyat kodeksi 97-moddasi 1-qismi (qasddan odam o‘ldirish) bilan aybdor deb topilib, 13 yilga ozodlikdan mahrum qilindi. Jazoni umumiy tartibli koloniyalarda o‘tashi belgilandi.