Aldangan quruvchi o‘zi qurgan uylarni buzib tashladi

Buyuk Britaniyada jahl otiga mingan quruvchi o‘zi qurgan uylarni buzib tashladi. The Sun nashrining yozishicha, u yetkazgan zarar 2,5 million funt sterling atrofida deb baholangan.

Voqea Xartfordshir grafligidagi Bantingford shahrida yuz bergan. 30 yoshli Daniyel Nigou yangi qurilgan uylar oldiga ekskavatorda kelgan va beshta binoni buzib tashlagan. Guvohlarning aytishicha, u bu ishni qilayotganida kulgan va suratga ham olgan. Mahalliy aholi uni to‘xtatishga uringan. U esa qurgani uchun puli to‘lanmagan uylarni buzayotganini aytgan.

Tez orada yetib kelgan politsiya Nigouni hibsga oldi. Unga mulkka qasddan zarar yetkazish yoki yo‘q qilish moddasi bo‘yicha ayblov qo‘yildi. Nigou buning uchun 10 yilgacha qamalishi mumkin.