Xonadonga bostirib kirib, hovlisida turgan «Captiva»ni olib qochib ketgan shaxs ushlandi

Namangan viloyatining To‘raqo‘rg‘on tumanida shu yil 1 avgust kuni noma'lum shaxs yuziga niqob kiygan holda “Sharq” MFYda yashovchi M.M.ning uyiga bostirib kirib, o‘z xonasida uxlab yotgan 22 yoshli o‘g‘li M.N.ni pichoq bilan qo‘rqitib, pul talab qilib, uyidan 5 mln. 330 ming so‘m pulini olib, hovlisida turgan M.M.ga tegishli “Captiva” rusumli avtomashinani noma'lum tomonga haydab ketgan.

Bu haqda O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabar bermoqda.

Olib borilgan qidiruv ishlari natijasida avtomashina Chust tumani hududidan o‘tuvchi “Namangan-Pungon” avtomobil yo‘lining 44-km.da yo‘lni ikkiga ajratib turuvchi beton to‘siqqa urilgan holda topilgan. 

Ko‘rilgan choralar natijasida ushbu jinoyatni To‘raqo‘rg‘on tumani yashovchi muqaddam sudlangan 21 yoshli Sh.Z. sodir etganligi aniqlanib, ushlangan.