Tuzatish: Saudiyada ayol huquq himoyachisi qatl etilmagan, sud davom etyapti

Saudiya Arabistoni o‘zining ilk ayol huquq himoyachisini qatl etishi mumkin. Bu haqda huquq himoyasi bilan shug‘ullanuvchi tashkilotlar ogohlantirish berdi.

Middleeasteye’ning yozishicha, 29 yoshli Isra al-G‘omg‘am Qatif sharqiy mintaqasida hukumatga qarshi norozilik aksiyalarida va ijtimoiy tarmoqlarda inson huquqlari bo‘yicha kampaniyada ishtirok etganidan keyin 2015 yil qamoqqa olingan.

Al-G‘omg‘am va yana besh kishi «podshohga itoatsizligiga undash» hamda hukumatga qarshi namoyishlarni uyushtirishda ayblangan.

«Ayol huquq himoyachisini o‘lim jazosiga mahkum etish Saudiya Arabistonidagi xavfli holatdir», - deya aytib o‘tdi inson huquqlari bo‘yicha mutaxassis Ali Adubisi.

Biroq, sudning bu ish bo‘yicha qarori hali chiqarilmadi hamda bu jarayon oktabr oyining oxiriga qadar davom etadi. 

Ijtimoiy tarmoqlarda al-G‘omg‘am qatl etilgani haqida yolg‘on xabarlar ham tarqaldi.

Al-G‘omg‘am ishi bo‘yicha yakuniy sud majlisi 28 oktabrda bo‘lib o‘tadi, sudya o‘lim jazosini tasdiqlaydi yoki bekor qiladi. Agarda u tasdiqlansa, ish yakuniy ratifikatsiya qilish uchun qirol Salmon bin Abdulazizga yuboriladi.