Тузатиш: Саудияда аёл ҳуқуқ ҳимоячиси қатл этилмаган, суд давом этяпти

Саудия Арабистони ўзининг илк аёл ҳуқуқ ҳимоячисини қатл этиши мумкин. Бу ҳақда ҳуқуқ ҳимояси билан шуғулланувчи ташкилотлар огоҳлантириш берди.

Middleeasteye’нинг ёзишича, 29 ёшли Исра ал-Ғомғам Қатиф шарқий минтақасида ҳукуматга қарши норозилик акцияларида ва ижтимоий тармоқларда инсон ҳуқуқлари бўйича кампанияда иштирок этганидан кейин 2015 йил қамоққа олинган.

Ал-Ғомғам ва яна беш киши «подшоҳга итоатсизлигига ундаш» ҳамда ҳукуматга қарши намойишларни уюштиришда айбланган.

«Аёл ҳуқуқ ҳимоячисини ўлим жазосига маҳкум этиш Саудия Арабистонидаги хавфли ҳолатдир», - дея айтиб ўтди инсон ҳуқуқлари бўйича мутахассис Али Адубиси.

Бироқ, суднинг бу иш бўйича қарори ҳали чиқарилмади ҳамда бу жараён октябрь ойининг охирига қадар давом этади. 

Ижтимоий тармоқларда ал-Ғомғам қатл этилгани ҳақида ёлғон хабарлар ҳам тарқалди.

Ал-Ғомғам иши бўйича якуний суд мажлиси 28 октябрда бўлиб ўтади, судья ўлим жазосини тасдиқлайди ёки бекор қилади. Агарда у тасдиқланса, иш якуний ратификация қилиш учун қирол Салмон бин Абдулазизга юборилади.