2019 yilda shoshilinch tibbiy yordam uchun 200ga yaqin maxsus transportlar xarid qilinadi

2017 yil davomida sakkiz yarim milliondan ko‘proq fuqaroga tez tibbiy yordam tizimi orqali xizmat ko‘rsatildi. Uch millionga yaqin bemor statsionar va ambulator sharoitda davolandi. Shu davrda shoshilinch tibbiy yordam tizimida 50 mingdan ziyod bemorga yuqori texnologiyali operatsiyalar muvaffaqiyatli o‘tkazildi.

Sog‘liqni saqlash vazirligi axborot xizmati xabariga ko‘ra, ushbu ko‘rsatkich poytaxtda bo‘lib o‘tayotgan “O‘zbekistonda shoshilinch tibbiy yordam tizimi: muammolar, yutuqlar va istiqbollar” mavzuida shoshilinch tibbiy yordam tizimi shifokorlarining IV s'yezdida e'tirof etildi. 

Mazkur tadbirda Sog‘liqni saqlash vazirligi, Respublika shoshilinch tibbiy yordam ilmiy markazi, Respublika shoshilinch tibbiy yordam tizimi shifokorlari assotsiatsiyasi hamkorligida tashkil etilgan tadbirda mamlakatning olim va shifokorlari qatori Rossiya, AQSh, Turkiya, Janubiy Koreya, Germaniya, Isroil kabi dunyoning 15 davlatidan qariyb yetmish nafar malakali mutaxassislar ham ishtirok etmoqda.

Unda qayd etilganidek, davlat rahbarining 2018 yil 25 yanvarda qabul qilingan “Shoshilinch tibbiy yordam tizimini jadal takomillashtirish chora-tadbirlari to‘g‘risida”gi qarori ushbu yo‘nalishda aholiga ko‘rsatilayotgan tibbiy xizmatning tezkorligi, sifat va samaradorligini yanada oshirish, kadrlar salohiyatini yuksaltirish, ilm-fan yangiliklarini amaliyotga tatbiq etishda muhim dasturilamal  bo‘lmoqda. 

Respublika shoshilinch tibbiy yordam ilmiy markazida o‘tgan yili ellik mingdan ko‘proq yuqori texnologiyali operatsiyalar o‘tkazilgan. Jumladan, buyrak va jigar transplantatsiyasi amaliyoti yo‘lga qo‘yilgani tibbiyotning  muhim yutug‘i bo‘ldi. 

Tez tibbiy yordam xizmatining moddiy-texnika bazasi ham takomillashib bormoqda. Jumladan, o‘tgan yilda tez tibbiy yordam xizmati uchun 1269 ta ixtisoslashtirilgan avtotransport xarid qilindi va hududlarning ushbu texnikaga bo‘lgan ehtiyoji to‘liq qoplandi, dori-darmon va tibbiy buyumlar bilan ta'minlash 3 barobarga ko‘paydi. Ya'ni, bugungi kunda har bir chaqiriq uchun minimal xarajatlar 5000 so‘m miqdorida belgilandi. Yana bir e'tiborli jihati, joylardagi tez tibbiy yordam brigadalari va shoshilinch tibbiy yordam muassasalarining avtoparkini takomillashtirish maqsadida 2019 yili yana 200ga yaqin maxsus transportlar xarid qilish ko‘zda tutilgan. 

Shoshilinch tibbiy yordam tizimi shifokorlarining ikki kunlik s'yezdida tibbiyotimizning muhim yutuqlari va ilg‘or tajribalar ommalashtirilishi barobarida, dunyo tibbiyotida erishilayotgan muhim ilmiy-amaliy kashfiyotlar, yangi texnologiyalar hamda ulardan inson salomatligi yo‘lida samarali foydalanishga oid ma'ruzalar tinglanadi.