Ukraina harbiy-dengiz kuchlari kemalari Rossiyaning Qrim sohilidagi iqtisodiy hududiga kirdi

Ukraina harbiy-dengiz kuchlariga qarashli "Donbass" kemasi va "Korets" buksiri Qrim sohili yaqiniga, Rossiyaga tegishli iqtisodiy hududga kirib keldi, deb xabar berdi FXXning Qrim bo‘yicha chegara boshqarmasi.

"Ayni paytda Ukraina harbiy-dengiz kuchlarining ikki kemasi - "Donbass" boshqaruv kemasi va "Korets" buksiri Qrim sohili yaqinida, shimoli-sharqiy yo‘nalishda, Rossiyaga tegishli iqtisodiy hududda bo‘lib turibdi", — deyiladi xabarda.

Chegara boshqarmasi matbuot xizmatining bildirishicha, "xalqaro dengiz huquqi me'yorlariga muvofiq va Rossiya Federatsiyasi xavfsizligini ta'minlash maqsadida ularni Rossiya FXX chegara xizmatining sohilni qo‘riqlash kemalari kuzatib turibdi".