O‘zbekistonga tashrif buyurgan yaponiyalik sayyohlar miqdori rekord darajada oshdi

Joriy yilning 8 oyi muddatida O‘zbekistonga tashrif buyurgan yaponiyalik sayyohlar soni o‘tgan 2017 yilga nisbatan 154 foizga oshdi va 10028 kishini tashkil etdi. Bu haqda “Dunyo” axborot agentligi xabar bermoqda.

Yozgi mavsumda yaponiyaliklar tashrif buyurishni istagan davlatlar orasida O‘zbekiston ikkinchi o‘rinda qayd etilgan. Bu haqda Yaponiyaning yetakchi sayyohlik korporatsiyasi bo‘lmish HIS’ning joriy yil iyul oyida e'lon qilingan reytingida ko‘rsatilgan.

“O‘zbekistonning sayyohlik brendini targ‘ib etishda mamlakatning Yaponiyadagi elchixonasi ulkan ishlarni amalga oshirdi. Joriy yilning o‘zida o‘zbek diplomatlari tomonidan Yaponiya poytaxti va yirik shaharlarida 100 dan ortiq muzokara va taqdimotlar o‘tkazildi, jumladan, xalqaro turizm masalasida ham”, deyiladi ma'lumotda.

Ma'lumot o‘rnida: O‘zbekiston Prezidenti Shavkat Mirziyoyev 2 fevral kuni mamlakatning sayyohlik salohiyati rivoji uchun qulay shart-sharoitlar yaratish bo‘yicha qo‘shimcha tashkiliy choralar ko‘rish haqidagi farmonni imzolagandi. Unga ko‘ra, shu yilning 10 fevralidan Isroil, Indoneziya, Koreya Respublikasi, Malayziya, Singapur, Turkiya va Yaponiya fuqarolari O‘zbekistonga vizasiz kirishi (30 kungacha) mumkin bo‘ldi.