Vetnamda yarim asr avval yo‘qolgan uchuvchi qoldiqlari topildi

Vetnamning junglilarida ikki uchuvchi qoldiqlari topildi. Taxminlarga ko‘ra, ulardan biri 47 yil avval yo‘qolgan sobiq ittifoq uchuvchisi Yuriy Poyarkov bo‘lishi mumkin.

Aviatsiya tarixchisi Nikolay Bodrixinning ma'lum qilishicha, Poyarkov Vetnam xalq armiyasida uchuvchi-instruktor bo‘lib xizmat qilgan. 1971 yil aprelda u va uning sherigi MiG-21S qiruvchi samolyotida o‘quv parvozini bajarish vaqtida yo‘qolib qolgan.

“Vetnamliklar samolyotning qulagan joyini 10 kun qidirishgan, biroq uni topolmagach, qidiruvni to‘xtatishgan”, deb ma'lum qilgan Bodrixin.

Uchuvchining nabirasi iltimosiga ko‘ra oxirgi bir yil davomida Vetnamning shimoliy qismida qidiruv operatsiyasi olib borilgan. Qoldiqlar bilan birga qiruvchi samolyot bo‘laklari ham topilgan.