Ukraina Rossiyadan «Ukrzaliznitsya» davlat shirkatiga tegishli 30 mingta vagonni qaytarib berishni talab qilmoqda. Bu haqda Oliy rada raisi o‘rinbosari, Ukrainaning Minsk kelishuvlari bo‘yicha aloqa guruhining gumanitar kichik guruhidagi vakili Irina Gerashchenko ma'lum qildi, deb xabar bermoqda UNIAN.
Uning so‘zlariga ko‘ra, ushbu vagonlardan 85tasi Yevropa tiklanish va taraqqiyot bankining kredit mablag‘lari evaziga sotib olingan. Gerashchenkoning ma'lum qilishicha, «ruslar tajovuzidan» keyin «ishg‘ol qilingan hudud»da 30 mingta vagon qolib ketdi.
«Albatta, biz Ukrainaning vakolatli huquqni muhofaza qilish idoralariga murojaat qilmoqdamiz, bu o‘g‘irlik uchun jinoiy ishlar qo‘zg‘atilishi kerak», - deydi Gerashchenko. Uning ta'kidlashicha, bu vagonlarni hozir sotishga ham urinishmoqda.
Ukraina hukumati yanvar oyida Donbassning reintegratsiyasi to‘g‘risidagi qonunni qabul qildi. Unda Rossiya «tajovuzkor» deb ataladi, o‘zini mustaqil deb e'lon qilgan hududlar esa «bosib olingan yerlar», deb tasniflanadi. Rossiya hukumati Ukraina sharqidagi voqealarga aloqasi yo‘qligini bir necha bor ta'kidlagan.
Eslatib o‘tamiz, avvalroq Poroshenko Donbassning alohida maqomini uzaytirish taklifi bilan chiqqandi.
