Turkiya Saudiya Arabistoni bosh konsulligi binosida tintuv o‘tkazmoqchi
Turkiyaning mutasaddi idoralari saudiyalik jurnalist Jamol Qoshiqchining yo‘qolishi bilan bog‘liq holda Saudiya Arabistonining Istanbuldagi bosh konsulligi binosida tintuv o‘tkazmoqchi. Anqara shu munosabat bilan Saudiya Arabistoni elchisini chaqirtirib, unga tintuv qilishga rasmiy talabni topshirgan. Bu haqda Daily Sabah nashri ma'lum qildi.
Turkiya konsullik binosida jurnalist bo‘lishi mumkinligini taxmin qilmoqda. Konsullikda esa bu ma'lumot inkor etilmoqda.
Jurnalistning yo‘qolgani 3 oktabrda ma'lum bo‘lgan. U Saudiya Arabistoni bosh konsulligiga hujjatlarni rasmiylashtirgani kelganidan keyin yo‘qolib qolgan. Saudiya Arabistoni matbuot agentligi ma'lumotlariga ko‘ra, jurnalist konsullik binosidan chiqib ketgandan keyin yo‘qolgan.
Saudiya Arabistoni valiahd shahzodasi Muhammad bin Salmon Turkiya mutasaddi idoralari Istanbuldagi bosh konsullik binosini tintuv qilishlari mumkinligini aytgan.
Jurnalist konsullikka Turkiyada yashovchi qallig‘i bilan nikoh qurish uchun zarur bo‘lgan hujjatlarni rasmiylashtirish uchun kelgan.
Turkiya prezidenti maslahatchisi Yasin Aqtayning fikricha, jurnalist bosh konsullikda o‘ldirilgan bo‘lishi mumkin. Jurnalist konsullik binosiga kirgach, u yerdan diplomatik raqamlarga ega 6 ta mashina, jumladan 2 ta furgon chiqib ketgan. Turkiyada bu mashinalarda jurnalist jasadi olib chiqib ketilgan bo‘lishi mumkinligi aytilmoqda.
Mavzuga oid
08:20 / 11.09.2024
«Umra – 2024» yangi mavsumi boshlandi
09:44 / 29.06.2024
Haj vaqtida 10 ga yaqin O‘zbekiston fuqarosi vafot etgani aytilyapti
18:28 / 24.06.2024
Haj mavsumida vafot etganlar sonining ko‘pligi sabablari ma’lum qilindi
20:14 / 20.06.2024