22:10 / 12.10.2018
4229
Windows 10’нинг охирги янгиланмаси жиддий муаммолар келтириб чиқарди 
Фото: Pinterest

Windows 10 операцион тизимида ишловчи компьютерлар фойдаланувчилари дастурнинг охирги янгиланмаси ўрнатилгандан кейин бошланган жиддий муаммолардан шикоят қила бошлашди.

Ушбу янгиланма файлларнинг ўчириб ташланишига олиб келувчи аввалги хатони тўғрилаши керак эди. Бироқ бунинг ўрнига янги муаммолар келтириб чиқарди.

Фойдаланувчиларнинг таъкидлашларича, янгиланма ўрнатилгандан сўнг компьютер “кўк ўлим экрани” деб аталувчи огоҳлантириш билан юклана бошлаган. Бунда кўк фонда тизимнинг ишида бартараф этиб бўлмас хато ҳақида хабар чиқади.

Microsoft форумидаги хабарларга кўра, носозлик Hewlett-Packard ишлаб чиқарган кўплаб компьютерлар ва ноутбукларни қамраб олган. Муаммо HP’нинг дастурий таъминоти таркибига кирувчи HpqKbFiltr.sys файлида эканлиги аниқланган. Компьютер юкланганда “кўк ўлим экрани” пайдо бўлишидан бу файлни бошқа жойга кўчириш ёки қайта номлаш билан халос бўлишга муваффақ бўлинган. 

Аввалроқ Windows 10’нинг янгиланмаси ўрнатилгандан сўнг фойдаланувчилар ўз компьютерларидаги “Менинг ҳужжатларим” папкасидаги файллари ўчириб юборилганидан шикоят қилишган. 

Top