AQSh aviatashuvchi kemasi 1991 yildan beri birinchi marta Arktikaga kirdi

AQSh harbiy-dengiz flotining atom aviatashuvchi kemasi “Garri Trumen” 1991 yildan beri birinchi marta Shimoliy qutb aylanasini kesib o‘tib, Arktikaga kirgan AQSh aviatashuvchi kemasi bo‘ldi. 

Kemaga 8-aviatashuvchi zarbkor guruh kemalari hamkorlik qilmoqda. Kema Norvegiyada o‘tadigan Trident Juncture mashg‘ulotlarida ishtirok etishga yo‘nalgan. Harbiy mashg‘ulotlarda 31 ta davlatdan (NATOning 29 davlati, Finlyandiya va Shvetsiya) 50 mingga yaqin harbiy, 100 dan ko‘proq uchar qurilma, o‘nlab kema ishtirok etadi. Mashg‘ulotlar 25 oktabrdan 7 noyabrgacha davom etadi. 

Avvalroq amerikalik general AQSh kemasi Norvegiyada “Rossiyaga NATOning salohiyatini ko‘rsatib qo‘yishini” aytgan.

AQSh aviatashuvchi kemalaridan oxirgi marta Arktikaga kirgani “Amerika” kemasi bo‘lib, bu 1991 yil sentabrda yuz bergan. Kema ham qo‘shma mashg‘ulotlarda ishtirok etgan.