Efiopiyada maxsus xizmatlarning 36 xodimi hibsga olindi 

Efiopiya huquq-tartibot idoralari korrupsiya va inson huquqlarini buzish gumoni bilan mamlakat xavfsizlik xizmatlarining 36 xodimini hibsga oldi. Bu haqda mamlakat bosh prokurori Burxon Tsegayyega iqtibos keltirgan holda Africanews telekanali ma'lum qildi.  

Ma'lum qilinishicha, 5 oyga yaqin davom etgan tergov davomida huquq-tartibot idoralari 7 ta noqonuniy yer osti turmasini aniqlashgan. Taxmin qilinishicha, gumonlanuvchilar bu turmalardan qiynoqlar o‘tkazishda foydalangan.    

Ta'kidlanishicha, Efiopiyaning Metals and Engineering Corporation (METEC) davlat kompaniyasi xodimlari ham hibsga olingan. Ular korrupsiyaga aloqadorlikda gumonlanmoqda. “METEC 6 yil ichida biror-bir tendersiz 2 mlrd dollarlik xaridlarni amalga oshirgan”, deb ma'lum qilgan Tsegayye.

Uning ta'kidlashicha, hibsga olinganlarning umumiy soni 63 nafarni tashkil qiladi.