«MYu»-«Yuventus» o‘yinida maydonga tushib Ronalduning oldiga borgan fanatning ikkita «to‘pponchasi» bo‘lgan

«Manchester Yunayted» Chempionlar ligasi doirasidagi «Yuventus»ga qarshi bahsda (0:1) begona shaxslarning maydonga tushib kelgani tufayli jarimaga tortildi.

Manchesterdagi o‘yin vaqtida muxlislar turinliklar hujumchisi Krishtianu Ronalduga yaqin kelish maqsadida bir necha marotaba maydonga tushib ketishgandi. Bunday holat jami uch marotaba kuzatilgan.

UYeFA «MYu»ni stadiondagi xavfsizlik ta'minlanmagani uchun 8 ming yevro jarimaga tortdi.

BBC`ning qayd etishicha, ushbu uch nafar shaxsdan biri stadionga ikkita o‘yinchoq to‘pponcha bilan kirib kelgan. U bu «qurollar»ini maydonga chiqqan vaqtida qo‘liga olmagan. O‘yinchoqlar keyinroq uning cho‘ntagidan topilgan.

«MYu» mavsum boshidan buyon ikkinchi marotaba jarimaga tortilmoqda. Mankunianliklar o‘tgan oyda «Valensiya» bilan «Old Trafford»da kechgan o‘yin belgilanganidan kechroq boshlangani sabab 15 ming yevro tovon to‘lagan edi.