O‘zbekiston va Iordaniya Tashqi ishlar vazirliklari birinchi siyosiy maslahatlashuvlarni o‘tkazadi

2018 yilning 29 noyabr kuni O‘zbekiston Respublikasi tashqi ishlar vazirining birinchi o‘rinbosari Ilhom Ne'matov Iordaniya Hoshimiylar Qirolligining favqulodda va muxtor elchisi Solih Ahmad Al-Javarneh bilan uchrashdi.

TIV xabariga ko‘ra, ikki tomonlama munosabatlarning hozirgi holati ko‘rib chiqilgan va turli jabhalardagi O‘zbekiston – Iordaniya munosabatlarini rivojlantirishning istiqbolli yo‘nalishlari muhokama qilingan.

Jumladan, 2019 yilda birinchi vazirliklararo siyosiy maslahatlashuvlarni o‘tkazish hamda savdo-iqtisodiy va investitsion sohalardagi hamkorlikni rivojlantirishga qaratilgan tuzilmalarni birgalikda tashkil etish, ikki davlat ishbilarmon doiralarining aloqalariga tizimlilik tusini berish to‘g‘risidagi takliflar ko‘rib chiqilgan.

Uchrashuvda madaniy-gumanitar sohadagi hamkorlikka, Iordaniya turistlarining O‘zbekistondagi islomiy qadamjolarni ziyorat qilishlari uchun qulayliklar yaratishga alohida e'tibor qaratildi, deyiladi xabarda.