Toshkentda avtomobillarni yuvish shoxobchasi ishchisi yuvish uchun qoldirilgan mashinani olib qochdi

Toshkent shahrining Mirzo Ulug‘bek tumanida 19 dekabr kuni Tuzel 1-dahada yashovchi, Parkent ko‘chasida joylashgan avtomashinalarni yuvish shoxobchasi ishchisi A.E. shu shoxobchaga yuvish uchun qoldirilgan A.K.ga tegishli “Spark” rusumli avtomashinasini haydab qochgan.

O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabariga ko‘ra, ko‘rilgan choralar natijasida A.E. avtomashinani Yashnobod tumanida joylashgan “Cho‘lpon” YPX maskanidan haydab o‘tib ketayotganida, shu yerda xizmat olib borayotgan yo‘l-harakati xavfsizligi xodimlari tomonidan qo‘lga olingan.

Holat yuzasidan jinoyat ishi qo‘zg‘atilib, tergov harakatlari olib borilmoqda.