Fohishalikka yuborilayotgan ayollar Toshkent aeroportida to‘xtatib qolindi - IIV

Shu yilning 30 yanvar kuni O‘zbekiston Respublikasi Ichki ishlar vazirligi tezkor xodimlari tomonidan o‘tkazilgan tadbirda, Toshkent shahridagi I.Karimov nomidagi xalqaro aeroport orqali Turkiyaning Istanbul shahriga 2 nafar ayollarni shahvoniy maqsadlarda foydalanish uchun yuborayotgan jinoiy guruhning ikki a'zosi qo‘lga olindi. 

O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabariga ko‘ra, jinoiy guruh a'zolari Istanbul shahrida qo‘shmachilik bilan shug‘ullanuvchi o‘zbekistonlik ayol bilan oldindan til biriktirib, uning ko‘magida aviachiptalar sotib oladilar. 

Ular Istanbulga yuborilayotgan ayollarga avvaliga 1500 AQSh dollari ishlab berish sharti bilan kelishadilar. 

Daliliy ashyolar bilan qo‘lga olingan 1983 yilda tug‘ilgan Q.A. va 1985 yilda tug‘ilgan U.M.(ayol)ga nisbatan tegishli hujjatlar rasmiylashtirildi, deyiladi xabarda.