Tramp senat qo‘mitasi uning Rossiya bilan aloqalarini tasdiqlovchi dalil topa olmaganini ma'lum qildi

AQSh prezidenti Donald Tramp senatning razvedka bo‘yicha qo‘mitasi rahbari Richard Byorrga tayanib qo‘mita uning Rossiya bilan aloqalarini tasdiqlovchi hech qanday dalil topa olmaganini ma'lum qildi.

"Senator Richard Byorr, razvedka bo‘yicha qo‘mita rahbari hozirgina ikki yillik surishtiruv, ikki yuzdan ortiq intervyu va minglab hujjatlardan so‘ng Tramp va Rossiya o‘rtasida hech qanday maxfiy kelishuv yo‘qligini aniqlaganini xabar qildi. Kimdir bundan hayron qoldimi?" – deb yozdi Tramp Twitter sahifasida.

Avvalroq AQSh senatining razvedka bo‘yicha qo‘mitasi Rossiyaning 2016 yildagi AQSh prezidenti sayloviga "aralashuvi" to‘g‘risida yangi hisobotni chop etgandi.  

Rossiya bu ayblovni bir necha bor rad etgan.