Xudoyberdi To‘xtaboyev: O‘zbek adabiyoti sahifalarini Yevropa adabiyotiga berib bo‘ldik

Bugun, 12 fevral kuni O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi press-xollida O‘zbekiston xalq yozuvchisi Xudoyberdi To‘xtaboyevning yangi nashr qilingan asarlari taqdimoti bo‘lib o‘tdi. Taqdimotda ishtirok etgan Kun.uz muxbiri shu haqda xabar berdi.

Tadbirda yozuvchi Xudoyberdi To‘xtaboyev va o‘zbek bolalar adabiyoti vakillari qatnashib taqdimotdagi «Tagob qishloq ertaklari», «Shirin qovunlar mamlakati», «Uch sayyohning safari», «Donishmand bobo ertaklari» hamda «Sir ochildi» nomli kitoblar bo‘yicha o‘quvchilar, OAV xodimlariga batafsil ma'lumot berdi.

Kitob taqdimoti tadbirida yozuvchi Xudoyberdi To‘xtaboyev o‘zbek bolalar adabiyoti va uning muammolari haqida gapirdi.

«Tan olaylik, bugungi adabiyotimizda bolalarimiz uchun yozilayotgan asarlar juda oz. She'r yetarli, lekin proza...

«Birovning bolasini birovning otasi tarbiyalamasin», degan gap bor. Afsuski, bugun ko‘pchilik o‘zbek bolalari Yevropa adabiyoti namunalarini o‘qib katta bo‘layapti. O‘zbek adabiyoti sahifalarini Yevropa adabiyotiga berib bo‘ldik. Buning oqibati yaxshi bo‘lmaydi», deydi yozuvchi.

Shuningdek, Xudoyberdi To‘xtaboyev O‘zbekiston yozuvchilar uyushmasi tarkibida bolalar adabiyotini rivojlantirish bo‘yicha maxsus bo‘lim tashkil etish tashabbusini ham bildirdi. Balki kimdir bunday bo‘lim bor, deyishi mumkin, lekin men, bolalar yozuvchisi buni bilmayman, - deydi u.

Taqdimotda o‘zbek bolalar adabiyotini rivojlantirish, uning muammo va kamchiliklarini o‘rganish uchun yozuvchi va shoirlarning uchrashuv, konferensiyalarini tizimli ravishda tashkil etib borish, shu orqali ularning hamfikr bo‘lishini ta'minlash taklifi bildirildi.