Xudoyberdi To‘xtaboyev: «Odamlar ruhiyatida bo‘layotgan o‘zgarishlarni ko‘rsatib beradigan asarlar kerak»

Unda Po‘lat Mo‘minninng «Qovoqvoy va chanoqvoy», Nosir Fozilovning «Qahr va mehr», Anvar Obidjonning «Quvnoq-quvnoq bolalar», Dilshod Rajabning «Yo‘lim quyosh tomondir» asarlari taqdim etildi.

Tadbirda O‘zbekiston xalq yozuvchisi Xudoyberdi To‘xtaboyev so‘zga chiqib, bugungi adabiyot oldida turgan vazifalar haqida to‘xtalib o‘tdi.

«Hozir har birimizning yelkamizda katta mas'uliyat turibdi. Yurtimizda bo‘layotgan ruhiy o‘zgarishlarni ko‘rsatadigan asarlar yarata olishimiz zarur. Qarashlarimizga, xarakterimizga har kuni nimadir qo‘shilyapti. Ana shu o‘zgarishlarni tanlab, ularni asarlarga singdirish kerak», – deya Xudoyberdi To‘xtaboyevning so‘zlarini keltirmoqda Kun.uz muxbiri.

Yozuvchilar uyushmasi Bolalar va o‘smirlar adabiyoti kengashi rahbari Orif To‘xtash ham so‘zga chiqib, endi bolalar uchun kitob chop etish ishlariga alohida e'tibor berish zarurligiga to‘xtalib o‘tdi.

Fizika-matematika fanlari doktori, atoqli bolalar shoiri Po‘lat Mo‘minning o‘g‘li Ozod Mo‘minovning fikricha esa, bolalar adabiyotida ma'lum muddat yarq etgan iste'dodlar ko‘rinmay qolgan edi, hozir sekin-sekin bu yo‘nalish ham jonlanib bormoqda.

«O‘zbekiston aholisining to‘rtdan biri bolalardan iborat. Ularning tarbiyasi biz uchun muhim, tarbiyani esa adabiyotsiz berib bo‘lmaydi. Shuning uchun bolalar adabiyotida yaxshi asarlar doimiy ravishda yaratilishi kerak», – dedi Ozod Mo‘minov.

Bundan tashqari, kitob taqdimotida «Bulbulcha» bolalar ashula va raqs ansambli rahbari Shermat Yormatov ham so‘zga chiqib, bugun bolalar o‘rganayotgan ashulalar va she'rlarga alohida ahamiyat berish zarurligini aytdi.

«Xalq ta'limi vazirligiga iltimos qilaman. Musiqa darslarida bolalarga hushyor bo‘lishimiz kerak. Ularga o‘zlarining yoshiga mos qo‘shiqlar,  she'rlar o‘rgatishimiz kerak, katta yoshdagilarning qo‘shiqlarini emas. Bu ularning tarbiyasiga ham bevosita ta'sir qiladi», – dedi Shermat Yormatov.