«Quruq gaplar». Pompeo Putinning bayonotini jiddiy qabul qilmadi

AQSh davlat kotibi Mayk Pompeo ma'lum qilishicha, Vashingtonning O‘rta va kichik masofadagi raketalarni yo‘q qilish to‘g‘risidagi bitimdan chiqishi hamda Yevropada Amerika qurollarini joylashtirish oqibatlari bo‘yicha Rossiya prezidenti Vladimir Putinning ogohlantirishlari jiddiy emas. Bu haqda TASS xabar bermoqda.

Pompeoning so‘zlariga ko‘ra, Rossiya yetakchisi shunchaki qo‘rqitib qo‘yishga urinib, tahdid qilmoqda.

«Bu, albatta, shunchaki balandparvoz so‘zlar hisoblanadi», - deya qo‘shimcha qilib o‘tdi Pompeo.

Pompeoning ishonch bildirishicha, AQSh ushbu bitimda yozib qo‘yilgan hech qanday majburiyatlarga ega emas, sababi «Rossiyaning o‘zi bu bitim shartlarini buzgan».

Eslatib o‘tamiz, avvalroq Putin AQSh raketalarining Yevropada joylashtirilishiga javob qanday bo‘lishini aytgandi.