“Toshshahartransxizmat” AJda avtobus yo‘nalishlarida muntazam o‘tkazilayotgan monitoring natijalari bo‘yicha kengaytirilgan yig‘ilish bo‘lib o‘tdi. Aniqlangan muammolar, ularni bartaraf etish choralari atroflicha muhokama etildi.
Avtobuslardagi nosozliklar, haydovchi va chiptachilar tomonidan yo‘l qo‘yilayotgan kamchiliklar yig‘ilishning bosh mavzusi bo‘lgan. Jumladan, avtobuslarda hamon antisanitariya holatlarining uchrayotgani, salon qismlaridagi nosozliklar o‘z vaqtida bartaraf etilmayotgani, haydovchilarning “GPS” tizimini qasddan o‘chirish kabi qator holatlarning qayd etilayotgani ta'kidlangan.
Ayniqsa, 1-,2-,4- avtobus saroylariga qarashli avtobuslarda ana shunday o‘zboshimchalik va o‘zbo‘larchiliklarga yo‘l qo‘yilayotgani aniqlangan.
Yig‘ilish xulosasiga ko‘ra, bunday holatlarga mas'uliyatsizlik bilan qaragan haydovchilar ishdan olindi.
Bundan oldin, Toshkentda bir nechta avtobus yo‘nalishga chiqarilmagani, ularning sanitariya va texnik holati talab darajasida bo‘lmagani xabar berilgandi.
