Rossiyada dunyodagi eng qimmat dorining biologik muqobili yaratildi

Rossiyada dunyoda eng qimmat dori vositasi bo‘lgan ekulizumabning biomuqobili yaratildi, deb xabar berdi Rossiya Savdo-sanoat vazirligi.

Ekulizumab kam uchraydigan kasalliklar – paroksizmal tungi gemoglobinuriya (PTG) va g‘ayrioddiy gemolitik-uremik sindrom (G‘GUS) kasalliklarini davolashda qo‘llaniladi.

Ma'lumot berilishicha, Rossiyada PTG bilan kasallangan bitta bemorning bir yil davolanishi 26-27 million rubl (406-421 ming dollar), G‘GUS bilan kasallangan bemorning bir yil davolanishi esa 35-37 million rublga (546-578 ming dollar) tushadi.

Savdo-sanoat vaziri Denis Manturovning aytishicha, Rossiya kompaniyasi tomonidan yaratilgan preparat asliga nisbatan 25%ga arzonroq bo‘ladi. 

Ochiq ma'lumotlarga qaraganda, Yer yuzi bo‘yicha 8 ming kishi PTG kasalligiga chalingan.