O‘zbekistonda Turistik resurslar onlayn bazasi ishga tushirilmoqda

Turizmni rivojlantirish davlat qo‘mitasi sohada endigina faoliyatini boshlagan tadbirkorlik sub'yektlarini qo‘llab-quvvatlash maqsadida O‘zbekistondagi turistik resurslarning onlayn bazasini o‘zida jamlagan www.shop.silkroad.uz saytini ishga tushirmoqda. Qo‘mita matbuot xizmati shu haqidagi xabari bilan bo‘lishdi.

Turistik resurslar onlayn bazasida tadbirkorlik sub'yektlari o‘zlarining mehmonxona, sayohat, transport xizmatlari, ovqatlanish xizmatlari, madaniy meros obektlari, hunarmandchilik namunalari va suvenir buyumlar, gid-ekskursovodlar, sog‘lomlashtiruvchi turlar, turizm sohasida faoliyat yurituvchi sub'yektlarga xizmat ko‘rsatishi uchun zarur bo‘lgan maishiy va oziq-ovqat mahsulotlari bilan bog‘liq e'lonlarini joylashtirishlari mumkin.

Shuningdek, turizm sohasiga doir mahorat darslari hamda hududlardagi turistik tadbirlar haqidagi ma'lumotlar ham joylashtiriladi.

Bundan tashqari, savdo maydonchasi orqali soha mutaxassislari o‘zlari uchun kerakli ma'lumotlarga ega bo‘lishi mumkin.

Shunisi diqqatga sazovorki, www.shop.silkroad.uz saytida turizm sohasi bilan bog‘liq barcha e'lonlarni joylashtirish mutlaqo bepul.