Boeing korporatsiyasi ikkita aviahalokatdan keyin ko‘plab mamlakatlarda parvozlari taqiqlab qo‘yilgan 737 MAX samolyotlarini ishlab chiqarish qisqartirilishi to‘g‘risida xabar berdi.
Aprel oyi o‘rtalaridan Boeing bir oyda 52ta samolyot o‘rniga 42ta layner ishlab chiqarishni boshlaydi. Bu korporatsiyaga halokatlar bilan aloqador ekani aytilayotgan dasturiy ta'minotdagi muammolarni to‘g‘rilashga bor e'tibor qaratish uchun imkon beradi.
Avvalroq, korporatsiya mijozlarga yangi Boeing 737 MAX samolyotlari yetkazib berishni to‘xtatdi.
Bundan oldin, Indoneziyadagi Boeing 737 halokatining yangi tafsilotlari oshkor etilgandi.
Bloomberg xabariga ko‘ra, Indoneziyada halokatga uchragan, Lion Air aviakompaniyasining Boeing 737 MAX samolyoti hujum burchagi nosoz datchigi aviahalokatdan oldin AQShdagi samolyotlarga texnik xizmat ko‘rsatish markazida ta'mirlangan.
