Kim Chen In Shimoliy Koreya davlat kengashi rahbari etib qayta saylandi 

Shimoliy Koreyaning oliy xalq yig‘ini (bir palatali parlamenti) yaqinda o‘tgan saylovlardan keyingi ilk sessiyasida mamlakat yetakchisi Kim Chen Inni davlat kengashi raisi etib qayta sayladi, yangi bosh vazirni tayinladi va konstitutsiyani qayta ko‘rib chiqdi. Bu haqda Janubiy Koreyaning “Ryonxap” axborot agentligi xabar berdi. 

Agentlik ma'lumotlariga ko‘ra, sessiya natijalari Shimoliy Koreya markaziy radiosi tomonidan tongda e'lon qilingan.

Shimoliy Koreya bosh vaziri etib Koreya mehnat partiyasining Chagando viloyatidagi qo‘mitasining raisi Kim Chje Ryon tayinlangan. U Pak Pon Chju o‘rnini egallagan. 

Sessiya oliy xalq yig‘ini prezidiumi raisi – davlatning marosimlardagi rahbari sifatida Shimoliy Koreyaning eng keksa siyosatchisi Kim Yon Nam o‘rniga Tsoy Ryon Xeni tasdiqlagan.