Turkmaniston prezidenti Gurbanguli Berdimuhamedov “Turkmanneft” davlat konserni raisi Dovlatturdi Xojiyevni egallab turgan lavozimidan bo‘shatdi.
Prezidentning tegishli farmoni mamlakatning joriy yil 1-choragi uchun ijtimoiy-iqtisodiy rivojlanishi natijalariga bag‘ishlangan hukumatning kengaytirilgan yig‘ilishida imzolangan.
Davlat rahbari hujjatni imzolayotib, ayni vaqtda neft-gaz tarmog‘ida bir qator kamchiliklar borligini ta'kidlab o‘tgan.
“Yangi texnologiyalarni neftni chuqur qayta ishlashga tatbiq qilish bo‘yicha ishlar sekin ketmoqda. Shu sababli men Xojiyevni ishda qo‘yilgan kamchiliklar uchun lavozimidan bo‘shataman”, deb aytgan Turkmaniston prezidenti.
Berdimuhamedov neft-gazni qayta ishlash tarmog‘iga zamonaviy texnologiyalarni faol tatbiq qilish lozimligini uqtirib o‘tgan.
Konsern rahbari lavozimi Xojiyevning o‘rinbosari Japarguli O‘razov zimmasiga vaqtinchalik yuklangan.
2017 yil martida konsern raisi etib tayinlangan Xojiyev bungacha xizmat vazifalarini tegishlicha bajarmayotgani va davlat topshiriqlari bajarilishini ta'minlamayotgani uchun 2 marotaba hayfsan olgan.
“Turkmanneft” konserni “Turkmangaz” bilan bir qatorda Turkmaniston iqtisodiyotining negiz tarmog‘i hisoblanadi. Turli ma'lumotlarga ko‘ra, mamlakatda har yil 10 mln tonnadan ko‘proq neft olinadi. Bu hajm mamlakatning neftga ehtiyojini to‘liq qoplashga hamda neft va neft mahsulotlarining katta qismini tashqi bozorda sotishga imkon beradi.
