Og‘ir va o‘ta og‘ir jinoyatlarni sodir etib jazo o‘tayotgan besh nafar mahkuma ayol sud zalidan ozod etildi

19 aprel kuni Oliy sud jinoyat ishlari bo‘yicha sudlov hay'atida besh nafar og‘ir va o‘ta og‘ir jinoyatlarni sodir etgan mahkumalar arizasi nazorat tartibida ko‘rib chiqildi, deb xabar berdi Kun.uz muxbiri. 

Mahkumalar sodir etgan jinoyatlaridan kelib chiqib, yetti yarim yildan o‘n uch yilgacha ozodlikdan mahrum etilishgandi. 

Oliy sud taraflarni, prokuror va advokatlarni hamda mahkuma ayollarning so‘zlarini tingladi. Mahkumalar sodir etgan jinoyatidan pushaymonligini aytib, prezident va xalqdan kechirim so‘rashdi. Bundan tashqari, sudda ayblanuvchilarning yoshi, axloqi hamda jazoning asosiy qismini o‘taganligi hisobga olindi. Ular Xotin-qizlar qo‘mitasining kafillik xati asosida sud zalidan ozod etildi va yaqinlari bag‘riga qaytarildi.  

Xotin-qizlar qo‘mitasi bugun ozodlikka chiqarilgan bu ayollarga hayotini iziga solishga yordamlashish va nazoratiga olishini ta'kidladi.