Tramp Xitoyning yana 300 mlrd dollarlik mahsulotlariga boj kiritishni buyurdi

AQSh prezidenti Donald Tramp Xitoyning yana 300 mlrd dollarlik mahsulotlariga boj kiritish haqida topshiriq berdi. Bu haqda Amerika savdo vakili Robert Laytxayzerga tayanib Reuters va Bloomberg xabar berdi.  

Laytxayzer ushbu jarayon haqida batafsil ma'lumot bermagan. Yangi bojlar haqida yakuniy qaror hozircha qabul qilinmagan.

Uning bildirishicha, qaysi mahsulotlarga nisbatan boj joriy etilishi haqidagi ma'lumot dushanba, 13 may kuni AQSh savdo vakolatxonasi saytiga joylashtiriladi.

Bu ushbu haftada Trampning AQShga import qilinadigan Xitoy mahsulotlariga nisbatan boj kiritish haqidagi ikkinchi bayonotidir. U avvalroq, Xitoy bilan savdo muzokaralari arafasida ham ana shunday bayonot bergandi.