AQSh Hindiston S-400 tizimini sotib oladigan bo‘lsa unga nisbatan sanksiyalar kiritilishini ma'lum qildi

Hindistonning Rossiyada ishlab chiqarilgan S-400 zenit raketa majmuasini sotib olishi Nyu-Dehli va Vashingtonning mudofaa sohasidagi hamkorligiga xalal berishi mumkin. bu haqda AQSh davlat kotibining Janubiy va Markaziy Osiyo bo‘yicha yordamchisi o‘rinbosari Elis Uells ma'lum qildi.

"S-400ga nisbatan xavotirimiz shundan iboratki, bu Hindistonning AQSh qurollari bilan operativ mutanosibligi imkoniyatini cheklaydi. Hamkorlik borasida, mamlakat qanday qurollanish tizimlari va platformasini joriy etishi borasida strategik tanlov qilishga to‘g‘ri keladi", - dedi Uells.

Uning so‘zlariga ko‘ra, S-400 sotib olinadigan bo‘lsa, Hindistonga qarshi sanksiyalar kiritish masalasi "ko‘rib chiqiladi" va AQSh "S-400ni sotib olmasligi uchun Hindistonga qanday yordam berishni muhokama qilishda" davom etadi.

AQSh shuningdek, Turkiyaning ham S-400 tizimini sotib olishiga qarshi chiqmoqda va Anqaraga sanksiyalar solish bilan tahdid qilmoqda. Turkiya o‘z navbatida majmualar AQShga xavf solmasligini va Anqara ularni sotib olishdan voz kechmasligini aytib keladi.