«MYu» «Real»ga Pogba transferini amalga oshirish uchun muddat belgiladi

«Real» «Manchester Yunayted» bilan fransiyalik yarimhimoyachi Pol Pogba transferi bo‘yicha muzokaralarni davom ettirmoqda. Inglizlar klubi futbolchini sotishga qarshi emas, ammo bu transfer uchun ma'lum muddat belgilanadi. 

The Mirror manbasi xabariga ko‘ra, mankunianliklar rahbariyati ushbu havbek sotilishi uchun muddat belgilashgan. Klub fransiyalik futbolchisi bilan 8 avgustga qadar bo‘lgan davr ichida xayrlashishga rozi bo‘ladi. Shu sanadan so‘ng, Angliyada transferlar darichasi yopilishi munosabati bilan uning o‘rniga o‘rinbosar topa olmasligi uchun «qizil iblislar» Pogba transferi bo‘yicha barcha so‘rovlarni rad etadi.

Bundan avvalroq, madridliklar ushbu 26 yoshli futbolchi transferini avgust oyi oxiriga mo‘ljallashayotgani haqida xabarlar berilgandi.

Pogbaning o‘zi kecha «Pert Glori»ga qarshi kechgan o‘rtoqlik o‘yinidan keyin (2:0) jurnalistlar savollariga javob qaytarishni istamadi.

«Hojati yo‘q. Gaplashishga zarurat yo‘q», – deb aytdi u.

Ma'lumot uchun, Pogbaning «Yunayted» bilan amaldagi shartnomasi 2021 yilga qadar tuzilgan. 2018/19 yilgi mavsumda ushbu futbolchi jamoasining barcha turnirlar doirasidagi 47 o‘yinida maydonga tushib, 16 gol urgan va 11 golga uzatma bergan.