Ukraina kemasi Mavritaniya yaqinida cho‘kib ketdi

Ukrainaga tegishli “Ivan Golubets” okean trauleri bortida uzoq davom etgan yong‘indan keyin Mavritaniya sohillari yaqinida cho‘kib ketdi. Bu haqda 22 iyulda Facebook’da Ukraina prezidentining Qrimdagi sobiq vakili Boris Babin ma'lum qildi. 

Babinning ma'lum qilishicha, baliq ovlovchi kema 21 iyulda okeanda cho‘kib ketgan. Kema bortida 90 kishi bo‘lgan, ulardan ikki nafari halok bo‘lgan. 

“Kemaning voqea oldidan tushunarsiz xatti-harakatlari, avtomatik identifikatsiya tizimi o‘chirilishi va jamoaning kemani qutqarish vaqtidagi g‘alati harakatlari mutaxassislarga kema tryumlarida baliqdan tashqari, yana qiziqroq nimadir bo‘lganini taxmin qilishga imkon bermoqda. Birovga yaxshisi ko‘rsatmagan ma'qul bo‘lgan nimadir”, deb qo‘shimcha qilgan Babin. 

Kema Ukraina davlat kompaniyasiga tegishli bo‘lib, latviyalik tadbirkor tomonidan boshqarilgan. Bu kema Ukrainaga tegishli 4 ta okean kemasidan biri bo‘lgan. Bu kemalarda tarixan Yangi Zelandiya hududida baliq ovlangan. 3 yil avval “Ivan Golubets”ning joyi o‘zgartirilib, u Mavritaniya hududiga o‘tkazilgan.