O‘zbekistonda fermerlarga yer ajratish qanday amalga oshiriladi? 

O‘zbekistonda fermer xo‘jaliklari uchun yer ajratib berish tuman hokimining qarori bo‘yicha o‘tkaziladigan ikki bosqichli tanlov asosida amalga oshiriladi. 

Adliya vazirligining eslatishicha, birinchi bosqichda talabgorlarning imkoniyati quyidagicha baholanadi:

mutaxassisligi va ma'lumoti bo‘yicha – 5-10 ball;
qishloq xo‘jaligidagi ish staji bo‘yicha – 6-10 ball;
hisobvaraqdagi pul mablag‘i yoki mol-mulki bo‘yicha – 4-10 ball;
texnika vositalari turi va texnik imkoniyatlari bo‘yicha – 1-10 ball;
talabgor fermer xo‘jaligi boshlig‘i yoki oilaviy pudratchi bo‘lsa – 4-10 ball;
talabgor qishloq xo‘jaligi kooperativlari hamda boshqa qishloq xo‘jalik korxonalari va tashkilotlari rahbari va xodimi bo‘lsa – 4-10 ball;
talabgor O‘zbekiston fermer, dehqon xo‘jaliklari va tomorqa yer egalari kengashlari hamda O‘zbekiston yoshlar ittifoqi tomonidan birgalikda berilgan tavsiyanoma xatga ega bo‘lsa – 10 ball.

Tanlovning ikkinchi bosqichida talabgorning arizasi, biznes-rejasi va boshqa tavsiyanoma xatlari 5 balldan 10 ballgacha, shuningdek fermer xo‘jaligi faoliyatini yuritish va boshqarish bo‘yicha berilgan savol-javoblar asosida uning qobiliyati, bilimi, ishbilarmonligi va saviyasi 10 ballgacha baholanadi.