AQSh Afg‘onistonga gumanitar yordam doirasida 125 mln dollar ajratadi

AQSh prezidenti Donald Tramp ma'muriyati Afg‘onistonga gumanitar yordam ko‘rsatish uchun qo‘shimcha 125 mln dollar ajratadi. Bu haqda AQShning Kobuldagi elchixonasi ma'lum qildi.

Ushbu mablag‘ "oziq-ovqat mahsulotlari, ichimlik suvi, tez tibbiy yordam xizmati taqdim etish va tabiiy ofatlarga tayyorgarlik ishlariga" yo‘naltiriladi.  

"AQSh barcha mamlakatlarni Afg‘onistonga ko‘rsatiladigan yordam miqdorini oshirishga chaqiradi", - deyiladi elchixona bayonotida.  

Gumanitar yordamni ko‘paytirish haqidagi qaror Afg‘oniston hukumat kuchlari va "Tolibon" harakati o‘rtasidagi to‘qnashuvlar kuchayishi ortidan qabul qilindi. 

1 avgust kuni "Tolibon"ning Dohadagi ofisi rasmiy vakili Muhammad Suhayl Shahin AQSh bilan kelishuv imzolanishiga umid qilayotganini bildirgandi.