AQSh raketalarni yo‘q qilish bo‘yicha Rossiya bilan yangi shartnoma tuzishi mumkinligini bildirdi

AQSh qurollarni nazorat qilish bo‘yicha Rossiya bilan yangi kelishuv imzolash imkoniyatini ko‘rib chiqmoqda. Bu haqda AQSh davlat kotibining siyosiy masalalar bo‘yicha o‘rinbosari Devid Xeyl "Xabar 24" telekanaliga bergan intervyusida ma'lum qildi.

"Biz qandaydir yangi narsani ko‘rishni istardik. Ehtimol, sermahsul muzokaralar natijasida raketalarni yo‘q qilish bo‘yicha yangi shartnoma tuzish imkoniyati bordir. Bu har ikki tomon xohishi, maqsadlariga bog‘liq. Bu mavzuda rossiyalik hamkasblarimiz bilan bir nechta uchrashuv o‘tkazdik, ular davom etadi degan umiddaman", - dedi Xeyl.

Eslatib o‘tamiz, 2 avgust kuni AQSh davlat kotibi Maykl Pompeo Vashington O‘rta va kichik masofalarga mo‘ljallangan raketalarni yo‘q qilish to‘g‘risidagi shartnomadan chiqishini e'lon qildi. Rossiya tashqi ishlar vazirligi ham shartnoma 2 avgustdan AQSh tashabbusi bilan bekor qilinganini tasdiqladi.