Krishtianu Ronaldu: «Bu mavsum faoliyatimdagi so‘nggisi bo‘lishi mumkin»

Joriy mavsum «Yuventus» hujumchisi Krishtianu Ronaldu uchun professional faoliyatidagi oxirgisi bo‘lishi mumkin. Bu haqda u Portugaliyaning TVI radiosiga bergan intervyusida aytib o‘tdi.

«Buni bilmayman. Ehtimol, kelasi yil faoliyatimni tugatarman... Lekin 40-41 yoshgacha ham o‘ynay olishim mumkin.

Aniq bilmayman. Doim aytadiganim – o‘tib borayotgan lahzalardan zavqlanish kerak. Menga juda zo‘r imkon berilgan va men undan bahramand bo‘lishda davom etmoqchiman», – dedi 7-raqam egasi.

«O‘rnatgan rekordlari menikidan ko‘proq biror futbolchi bormi? Bo‘lmasa kerak», – deb qo‘shimcha qilgan u.

Ma'lumot uchun, Krishtianu faoliyati davomida «Sporting», «Manchester Yunayted» va «Real» klublarida ham o‘ynagan, jami 29ta jamoaviy sovrinni qo‘lga kiritgan. U YeChL va Yevropa chempionatlari tarixidagi eng yaxshi to‘purar va eng yaxshi assistent sanaladi.