Komada bo‘lgan homilador ayol sog‘lom farzand dunyoga keltirdi

Avstraliyaning Kvinslend shtatida yashovchi ayol koma holatida bo‘la turib sog‘lom qiz farzandni dunyoga keltirdi. Bu haqda The Sun nashri xabar berdi. 

25 yoshli Keytlin Stabbsda arteriovenoz malformatsiya kasalligi aniqlanib, u nur bilan davolanishga jo‘natilgan. Ko‘p o‘tmay ayol bo‘yida bo‘lib qolib, homilaga zarar yetkazmaslik uchun davolanishdan voz kechgan. 23 iyulda ayol homiladorlikning 8-oyida bo‘lganda unda bosh miya tomiri anevrizmi yuz bergan va u komaga tushib qolgan. 24 iyulga o‘tar kechasi ayolga kesarcha kesish qilingan. 

Ayol hamon komada qolmoqda va jiddiy davolanishga ehtiyojmand. Hozir uning davolanishi uchun pul to‘planmoqda. 2 sentyabrda qizchaga Kuin  ismi berildi va shifoxonadan chiqarildi. Shifokorlar ayolning salomatligi bo‘yicha prognozlar berishdan bosh tortishgan. 

Avvalroq iyunda komada bo‘lgan malayziyalik ayol farzand dunyoga keltirgani ma'lum qilingan. Ayolda bosh miya o‘simtasi tashxisi qo‘yilgan va u operatsiya qilingan. Ona hushsiz yotganiga qaramay, homila rivojlanishda davom etgan. Ayolga homiladorlikning 33-haftasida kesarcha kesish qilingan.