Xitoy O‘zbekistonning Afg‘onistonda tinch siyosiy jarayonni boshlash bo‘yicha sa'y-harakatlarini yuqori baholadi

2019 yilning 6 sentabr kuni O‘zbekiston Respublikasi prezidentining Afg‘oniston bo‘yicha maxsus vakili Ismatulla Ergashev Xitoy Xalq Respublikasining favqulodda va muxtor elchisi Jiang Yan bilan uchrashdi.

TIV xabariga ko‘ra, suhbat chog‘ida O‘zbekiston va Xitoyning Afg‘oniston muammosini hal qilish borasidagi sa'y-harakatlari, Afg‘onistonda turli loyihalarni amalga oshirishda O‘zbekiston-Xitoy hamkorligining ustuvor yo‘nalishlari muhokama qilindi.

Xitoy tomoni O‘zbekistonning Afg‘onistonda tinch siyosiy jarayonni boshlash bo‘yicha sa'y-harakatlarini yuqori baholagan.

Elchi Afg‘onistonning mintaqaviy loyihalarga jalb etilishi muhimligi haqidagi O‘zbekiston tomonining fikrini to‘liq qo‘llab-quvvatladi, bu esa mamlakatdagi vaziyatni barqarorlashtirish va uning ijtimoiy-iqtisodiy infratuzilmasini tiklashga yordam berishini ta'kidladi, deyiladi xabarda.