Oltiariqdagi ikki qo‘shni uyda yirik yong‘in sodir bo‘ldi

2019 yilning 11 sentabr kuni soat 03:45da Farg‘ona viloyati Oltiariq tumani “Ustoz” MFY, Tabassum ko‘chasida joylashgan ikki qo‘shni uylarda yong‘in bo‘layotganligi haqida yong‘in-qutqaruv qismiga xabar kelib tushgan.

O‘zbekiston Respublikasi FVV YoXBB OAV bilan hamkorlik qilish bo‘linmasi ma'lumotida aytilishicha, yong‘in haqida alanga maydoni kengayib ketgandan so‘ng yong‘in xavfsizligi xizmatiga xabar berilgani uchun 4 ta yong‘in o‘chirish bo‘linmalari ko‘rsatilgan manzilga yetib borganida imoratning asosiy tom qurilish konstruksiyalari yonayotganligi ma'lum bo‘lgan. Birinchi bo‘linmalar ko‘rsatilgan manzilga soat 04:00 da yetib borgan (eng yaqin yong‘in-qutqaruv qismigacha masofa 17 km). Ko‘rilgan tezkor harakatlar natijasida yong‘in soat 04:05 da qurshab olingan va soat 05:05 da to‘liq o‘chirilgan.

Yong‘in oqibatida 71-uyning 200 kv. metr maydonda tomi, shifti va uy jihozlari hamda 72-uy darvozaxonasining 10 kv.metr maydonda tom qismi yonib zararlangan. Yong‘indan 71-uyning uyning 100 kv. metr va 72-uyning esa 200 kv. metr maydoni saqlab qolingan. Yong‘in vaqtida 71-uy egasi fuqaro Yo.G‘iyosov kuyish tan jarohati olib shifoxonaga yuborilgan (ahvoli qoniqarli). 

Yong‘inning taxminiy sababi - sigareta chekishda ehtiyotsizlik. Moddiy zarar miqdori aniqlanmoqda.