Fransiyaning bir nechta hududida o‘rmon yong‘inlari avj olmoqda

AFP agentligining xabar berishicha, Fransiyaning janubidagi kuchli o‘rmon yong‘inlari bir necha hafta davom etgan o‘ta issiq va qurg‘oqchil ob-havo oqibatida yuzaga kelgan. Mamlakat bosh vaziri Sebasten Lekornyuning ta’kidlashicha, yong‘inlar odatda kutilgan muddatdan ikki-uch hafta oldin boshlangan.

Evakuatsiyaga sabab bo‘lgan eng yirik yong‘in Provans — Alp — Kot-dʼAzur mintaqasidagi Sent-Mari-la-Mer kommunasi yaqinida yuzaga kelgan. U yerdan xavfsizlik nuqtai nazaridan qariyb uch ming kishi ko‘chirilgan. Evakuatsiya qilinganlarning yarmi kempinglarda dam olayotgan sayyohlar bo‘lib, yong‘in oqibatida o‘nlab avtokemperlar va bungalolar yonib ketgan.

Yana bir yirik yong‘in Oksitaniya mintaqasida joylashgan Puzol-Minervua kommunasi atrofida qayd etilgan. Bu yerda qariyb 9 kvadrat kilometr o‘simlik qoplami yongan. Yong‘inni o‘chirish ishlariga 800 nafar yong‘in o‘chiruvchi, 150 ta maxsus texnika hamda bir nechta yong‘in o‘chiruvchi samolyot jalb qilingan.

Qutqaruv ishlarini soatiga 70 kilometrgacha yetadigan kuchli shamol yanada murakkablashtirmoqda. Shuningdek, Marsel shahri shimolidagi Ronyak va Lanson-Provans kommunalari atrofida ham yong‘inlar yuzaga kelgan.

Yong‘inlar transport harakatiga ham ta’sir ko‘rsatdi. Xususan, Marsel, Bordo va Avinon shaharlari o‘rtasidagi ayrim temiryo‘l qatnovlari vaqtincha bekor qilindi.

Marselda o‘tkazilgan matbuot anjumanida Fransiya bosh vaziri Sebasten Lekornyuning ma’lum qilishicha, faqat 1 iyul kunining o‘zida mamlakat bo‘ylab 12 kvadrat kilometr hudud yong‘indan zarar ko‘rgan. Yong‘inlar mavsumi boshlanganidan beri esa Fransiyada 7 mingga yaqin yong‘in qayd etilgan va ular natijasida 87 kvadrat kilometr yer maydoni kuyib ketgan.

Uning so‘zlariga ko‘ra, 1–2 iyul kunlari mamlakatning turli hududlaridagi yong‘inlarni bartaraf etish ishlariga ikki mingga yaqin yong‘in o‘chiruvchi safarbar etilgan.

Mutaxassislar yirik yong‘inlarni iyun oyida kuzatilgan rekord darajadagi issiqlik to‘lqini bilan bog‘lamoqda. Mamlakatda 11 kun davom etgan anomal issiq ob-havo paytida ayrim hududlarda havo harorati 40 darajadan oshgan.

Fransiya milliy meteorologiya xizmati — Météo-France kelasi hafta ham havo harorati yana ko‘tarilishini prognoz qilmoqda. Garchi u iyun oyidagi rekord ko‘rsatkichlarga yetmasligi aytilgan bo‘lsa-da, mamlakat ichki ishlar vaziri Loran Nunes aholini ehtiyotkor bo‘lishga chaqirib, «oldinda qiyin kunlar kutmoqda», deya ogohlantirgan.