Normativ-huquqiy hujjatlar loyihalari muhokamasi portalida O‘zbekiston Respublikasi prezidentining "O‘zbekiston Respublikasi yagona axborot siyosati konsepsiyasini tasdiqlash to‘g‘risida"gi qarori loyihasi e'lon qilindi.

Hujjatga ko‘ra, O‘zbekiston Respublikasining yagona davlat axborot siyosati Konsepsiyasi axborot sohasida O‘zbekiston Respublikasining davlat siyosatini amalga oshirishning maqsad, vazifalari, tamoyillari, ustuvor yo‘nalishlari va mexanizmlarini belgilovchi fikrlarning yagona va yaxlit tizimi hisoblanadi.

O‘zbekiston Respublikasining axborot sohasidagi milliy manfaatlari quyidagilarni o‘z ichiga oladi:

jinsi, irqi, millati, tili, dini, ijtimoiy kelib chiqishi, e'tiqodi, shaxsiy va ijtimoiy holatidan, shaxsiy hayotining himoyasidan qat'iy nazar inson va fuqaroning axborot olishga va undan foydalanishga konstitutsiyaviy huquqlarini himoya qilish va ta'minlash;

davlat hokimiyati va boshqaruv organlari faoliyatining ochiqligini ta'minlash, fuqarolik jamiyati va davlatning hamjihatlikda ishlash mexanizmlarini, huquqiy demokratik va kuchli ijtimoiy fuqarolik jamiyati shakllanishi uchun axborot bo‘yicha ko‘maklashishni ta'minlash;

davlat, jamiyat va fuqaro manfaatlaridan kelib chiqqan holda, mamlakatning infrastrukturasi, telekommunikatsiya tizimini va axborot xavfsizligini mustahkam va uzluksiz ravishda ta'minlash;

ekstremistik va terroristik tashkilotlarning, shuningdek boshqa buzg‘unchi kuchlarning aholi ongiga va xatti-harakatiga, ayniqsa yoshlarga ta'sir ko‘rsatadigan salbiy axborot va g‘oyasiga qarshi turish va ogohlantirish;

bolalarni ularning ruhiyatini jarohatlovchi buzg‘unchi axborot xurujlaridan himoya qilish, bolalarning hayotiga va sog‘lig‘iga tahdid soluvchi jinoyatlarni aks ettiruvchi xatti-harakatlarni sodir etishga undovchi axborotlarni tarqatilishiga yo‘l qo‘ymaslik;

milliy axborot tizimini rivojlantirish, jamoat xavfsizligini ta'minlash, jamiyatning ma'naviy-axloqiy, madaniy va demokratik qadriyatlarini mustahkamlash, milliy o‘zlikni anglash uchun sharoit yaratish, vatanparvarlik, intellektual, ilmiy-ta'limiy rivojlanish va shaxs va jamiyatning o‘z-o‘zini anglash maqsadida davlatning yagona axborot makonini shakllantirish;

aholi, ayniqsa, yoshlar orasida axborotdan foydalanish madaniyatini oshirish, qidiruv, tanlash, tahlil qilish, qayta ishlash va kerakli ma'lumotlarni tarqatish ko‘nikmalarini takomillashtirish;