Safoyev «Rosselxoznadzor»ning O‘zbekistonda vakolatxona ochishini taklif qildi

Rossiya veterinariya va fitosanitariya nazorati federal xizmati – «Rosselxoznadzor» O‘zbekistonda o‘z vakolatxonasini ochishi kerak, deb hisoblaydi Senat raisining birinchi o‘rinbosari Sodiq Safoyev.

Kun.uz muxbirining xabar berishicha, chorshanba kuni Oliy Majlis Senati va Rossiya Federatsiyalar Kengashi o‘rtasidagi hamkorlik bo‘yicha parlamentlararo komissiyaning Toshkentda o‘tgan yig‘ilishida Safoyev ana shunday taklif bildirgan.

Uning fikricha, ushbu chora O‘zbekiston meva-sabzavot mahsulotlarining Rossiyaga eksportini osonlashtirishga yordam beradi.

«O‘zbek eksportining ham hajmi oshishi uchun o‘rtamizdagi savdo-sotiqni muvozanatlashtirishdan manfaatdormiz. Rossiya tomonidan buning uchun talab mavjud.

Ba'zida institutsional va huquqiy mexanizmlar yetishmaydi. Meva-sabzavotlar mahsulotlari eksporti bo‘yicha gapiradigan bo‘lsak, «Rosselxoznadzor» o‘z vakolatxonasini bizning mamlakatimizda ochadigan payt keldi. Shunda sertifikatlash va boshqa ko‘plab masalalar o‘z yechimini topgan bo‘lardi», – dedi Safoyev.

Ma'lumot o‘rnida, 2019 yilning 9 oyi davomida O‘zbekiston-Rossiya tovar ayirboshlash hami 4 mlrd dollarga yetgan. Bu bilan Rossiya O‘zbekistonning Xitoydan keyingi (5,2 mlrd) ikkinchi eng yirik savdo hamkori bo‘lib qolmoqda.