Shimoliy Koreya yangi turdagi raketani uchirganini ma'lum qildi 

Shimoliy Koreya rasmiylari 2 oktabr ertalab mamlakatning sharqiy sohilbo‘yidagi suv osti kemasidan yangi ballistik raketa Pukguksong-3 muvaffaqiyatli uchirilganini xabar qilishdi. Ma'lum qilinishicha, sinov vaqtida yangi raketaning taktik ko‘rsatkichlari tasdiqlangan va qo‘shni davlatlar xavfsizligiga tahdid qilmagan. 

Sinovlarda Koreya mehnat partiyasining rahbar a'zolari ishtirok etishgan. Ular raketalar muvaffaqiyatli uchirilgani haqida darhol partiya markaziy qo‘mitasiga xabar qilishgan.

Shu munosabat bilan Shimoliy Koreya yetakchisi Kim Chen In sinov ishtirokchilariga o‘z tabrigini yo‘llagan.

Pukguksong-3 2016 yilda birinchi marta sinalgan ballistik raketaning navbatdagi versiyasi hisoblanadi.

2017 yil mayda Shimoliy Koreya Pukguksong-2 raketasini sinovdan o‘tkazgandi. Bu raketa 500 km uchib o‘tib, Yapon dengiziga tushgan. Ushbu sinovlar BMT Xavfsizlik kengashi tomonidan qoralangan.