Abdulaziz Komilov Bokuda Peter Siyarto bilan uchrashdi

2019 yil 14 oktabr kuni O‘zbekiston Respublikasi tashqi ishlar vaziri Abdulaziz Komilov Boku shahrida Vengriya tashqi iqtisodiy aloqalar va tashqi ishlar vaziri Peter Siyarto bilan uchrashdi. Vengriya Turkiy tilli davlatlar hamkorlik kengashida (Turkiy kengash) kuzatuvchi-davlat maqomiga ega.

TIV xabariga ko‘ra, Turkiy kengashga a'zo davlatlar tashqi siyosat idoralari rahbarlari Kengashi yig‘ilishida ishtirok etish uchun Ozarboyjon poytaxtiga kelgan vazirlar O‘zbekistonning tashkilotga kirishi ikki tomonlama munosabatlarni kengaytirish uchun yangi imkoniyatlar yaratishini ta'kidladilar.

Uchrashuvda umumiy kun tartibi, siyosiy, savdo-iqtisodiy, investitsiya, moliya, turizm, madaniy-gumanitar va boshqa sohalardagi, shuningdek xalqaro maydondagi, jumladan O‘zbekiston – Yevroittifoq, Vishegrad guruhi + Markaziy Osiyo va boshqa shakllaridagi hamkorlikni rivojlantirish istiqbollari bo‘yicha batafsil fikr almashildi.

Turli sohalardagi O‘zbekiston – Vengriya munosabatlarini rivojlantirish doirasida navbatdagi qo‘shma tadbirlarni o‘tkazish bo‘yicha takliflar ham ko‘rib chiqildi.