Afg‘oniston saylov komissiyasi prezident saylovining dastlabki natijasini e'lon qila olmadi

Afg‘oniston mustaqil saylov komissiyasi (MSK) raisi Havo Allam Nuristoniy prezident saylovining dastlabki natijasini belgilangan muddatda e'lon qila olmasligini bildirib uzr so‘radi.

Foto: Reuters

Avvalroq MSK sentyabrda bo‘lib o‘tgan saylovning dastlabki natijasi 19 oktyabrda, yakuniy natijasi 7 noyabrda e'lon qilinishini bildirgandi.

Matbuot anjumanida so‘zga chiqqan Nuristoniy komissiya texnik sabablar bois natijani belgilangan muddatda aniqlay olmaganini ma'lum qildi.

Afg‘onistonda 28 sentyabrda bo‘lib o‘tgan prezident saylovida 15 nafar nomzod, jumladan, amaldagi prezidenti Muhammad Ashraf G‘ani hamda bosh vazir Abdulla Abdulla ishtirok etgandi.

Bu 2001 yildan buyon Afg‘onistonda o‘tkazilgan to‘rtinchi prezident saylovi bo‘ldi.