21:43 / 21.10.2019
0
11315
Экспертлар энг яхши пенсия тизимига эга мамлакатларни айтишди

Рейтинг тузувчиларнинг фикрича, Нидерландия, Дания ва Австралия дунёдаги энг яхши пенсия тизимига эга

Фото: Marlene Awaad / Bloomberg

Mercer халқаро консалтинг компанияси ва Монаш университети ҳузуридаги молиявий тадқиқотлар маркази экспертлари 11-бор Melbourne Mercer Global Pension Index (MMGPI) жаҳон пенсия тизимлари рейтингини эълон қилди.

Тадқиқот муаллифлари жаҳоннинг 63 фоизга яқин аҳолиси яшовчи 37 давлатнинг пенсия тизимларини ўрганиб чиқди.  

Рўйхат тўрт гуруҳга — А дан (энг яхши) D гача (жиддий камчиликларга эга) бўлган тўрт гуруҳга бўлинди.

Биринчи гуруҳга мос равишда 81 ва 80,3 балл билан Нидерландия ва Дания киритилди. 

75,3 баллга баҳоланган Австралия B гуруҳида етакчи бўлди. Мазкур гуруҳга Финляндия (73,6 балл), Швеция (72,3), Норвегия (71,2), Сингапур (70,8), Янги Зеландия (70,1), Канада (69,2), Чили (68,7), Ирландия (67,3), Швейцария (66,7) ва Германия (66,1) кирди.

60–65 балл олган Буюк Британия, АҚШ, Малайзия, Франция ҳамда Ҳонконг С гуруҳининг энг юқори поғонасидан жой олди. Улардан кейинги ўринларда Перу, Колумбия, Польша, Саудия Арабистони, Бразилия, Испания, Австрия, ЖАР, Италия ва Индонезия жойлашди.

Жанубий Корея, Хитой, Япония, Ҳиндистон, Мексика, Филиппин, Туркия, Аргентина ва Таиланд D гуруҳидан ўрин олди.

Экспертлар рейтингни тузишда 40дан ортиқ кўрсаткичларни ҳисобга олган. 

Ушбу хабарга фикрингизни билдиринг. Бунинг учун авторизациядан ўтишингиз керак!
Top